Inuussutissarsiuteqarneq pillugu inatsiseqartitsineq
Danmarkimik naalagaaffeqatigiinneq tunngavigalugu inatsiseqartitsinerit saniatigut inuussutissarsiutinut tunngassuteqartut Inatsisartut inatsisaanni arlalinni aalajangersagaavoq. Inatsiseqartitsinerit tamakkua Inuussutissarsiornermut Suliffeqarnermullu Pisortaqarfimmit aqunneqarput.
Inuussutissarsiummik ingerlataqarneq pillugu inatsit
Inuussutissarsiummik ingerlataqarneq pillugu inatsit 2002-mi atuutilerpoq Inuussutissarsiummik Ingerlataqartunik Nalunaarsuiffik (IIN) nalunaaruteqartussaatitaanertalerlugu 2006-mi kingullermik allannguuteqartinneqartoq. Inatsit inuussutissarsiummik ingerlataqarneq aalajangersimasumillu sivisussusilimmik suliffimmik neqerooruteqartarnermut atuutsinneqarpoq. Inatsilli kalaalimineerniarfinniit tuniniaasarnermut aalisarnermilluunniit, piniarnermik aallaaniarnermillu inuussutissarsiuteqarnermik ingerlataqarnermut atuutinngilaq.
Kalaallit Nunaanni Inuussutissarsiummik Ingerlataqartunik Nalunaarsuiffik
Kalaallit Nunaanni Inuussutissarsiummik Ingerlataqartunik Nalunaarsuiffik, IIN, Kalaallit Nunaanni suliffeqarfiit namminersortutullu inuussutissarsiuteqartut tamarmiusut tunngaviusumik paasissutissartaannik qitiusumik nalunaarsuiffiuvoq.
Nalunaarsuiffiup siunertaraa:
· Kalaallit Nunaanni suliffeqarfeqarfiit pillugit tunngaviusumik paasissutissanik katersuinissaq
· Suliffeqarfiit ingerlatsiviillu immikkoortiterlugit normulersorneqartarnissaat
· Pisortanut inunnullu ataasiakkaanut tunngaviusumik paasissutissaateqartitsinissaq.
Unammilleqatigiinneq pillugu inatsit
Unammilleqatigiinnermut inatsiseqartitsineq Namminersornerullutik Oqartussat 1986-imi naalagaaffimmiit isumagisarilerpaat. Inatsisartut inatsisaat maanna atuuttoq naapertorlugu unammilleqatigiinnerup siuarsarneqarnissaa nioqqutissiornerup pitsaanerulersinneqarnissaa tunisassianillu tuniniaasarnerup kiffartuussinerillu pitsaanerulersinneqarnissaat siunertaapput. Inatsisartut inatsisaat Unammilleqatigiinneq pillugu Ataatsimiititaliamit aqunneqarpoq.
Takussutissiaq 1. Suliassat Unammilleqatigiinnermut Ataatsimiitsitaliamit suliarineqarsimasut
|
2001 |
2002 |
2003 |
2004 |
2005 |
2006 |
2007 |
2008 |
Saaffiginnissutit tigusat |
50 |
35 |
21 |
30 |
26 |
33 |
29 |
96 |
Saaffiginnissutit aalajangiiffigineqartut |
49 |
35 |
13 |
25 |
23 |
40 |
27 |
71 |
Najoqqutaq: Unammilleqatigiinnermut Ataatsimiitsitaliap aamma Atuisartunut Siunnersuisoqatigiit ataatsimut allaffeqarfiat
Nittartakkat takuneqarsinnaasut:
Inuussutissarsiorneq pillugu inatsiseqartitsineq, inuussutissarsiummik ingerlataqarneq pillugu inatsit aamma Kalaallit Nunaanni Inuussutissarsiummik Ingerlataqartunik Nalunaarsuiffik adressemi uani takuneqarsinnaapput: www.nanoq.gl
Unammilleqatigiinneq pillugu Ataatsimiititaliaq uani nittartakkami takuuk: www.unammineq.gl